The Noble Qur'an Encyclopedia

Dayga ug Himayaa ang Ngalan nga imong Ginoo (Allāh), ang Labing Taas,

Nga mao ang nagbuhat (sa tanang butang), ug unya miumol niini (sa kahingpit).

Nga maoy nagtino ug naggiya,

Nga maoy nag-paturok ug nagpagula sa sibsibanan,

Unya naghimo niini nga malaya sama sa abog.

Kami maghimo kanimo (Oh Muhammad) nga magalitok (sa Qur'an), aron nga ikaw dili makalimot,

Gawas sa unsay gibuot sa Allah, sa pagkatinuod Siya nasayud kun unsa ang dayag, ug unsa ang tinago.

Kami maghimo niini nga sayon ​​alang kanimo, (sa pagsunod) sa sayon ​​nga Dalan (sa Islam).

Busa padayun sa pagpahinumdum, basta ang pagpahinumdom mapuslanon.

Siya nga anaa sa kahadloki sa Allāh mahinumdom niini,

Apan ang labing alaot maglikay niini,

kinsa paga-sunugon sa labing dako nga kalayo.

Ug didto siya dili na mamatay ni mabuhi.

Siya sa pagkatinuod makabaton ug malungtarong kalipay kinsa nagaputli sa iyang kaugalingon (gikan sa kadautan),

Ug magdayeg sa Ngalan sa iyang Ginoo - Allāh - ug nag-ampo.

Apan gipalabi ninyo 'mga manlilimod' ang kinabuhi niining kalibutana,

Samtang ang Pikas Kinabuhi maoy labing maayo ug mas malungtaron.

Sa pagkatinuod, kini anaa sa nahaunang mga 'Balaan' nga Kasulatan,

Ang mga Kasulatan ni Abraham ug ni Moises.